“Ons was onlangs ’n klomp vriende by ’n braai en het lekker gekuier. Ek en my vriendin se man het in die gang in mekaar vasgeloop en voor ons ons kon kry, het ons mekaar gesoen. Ons het onmiddellik weer opgehou en albei besef ons het miskien een drankie te veel ingehad. Dit pla my baie. Daar is definitief niks tussen my en my vriendin se man nie, maar wat nou? Moet ek my man vertel dat dit een onbesonne oomblik was? Moet ons die vriendskap verbreek? Of moet ons maak of daar niks gebeur het nie?”

Timothy Kieswetter, Bybel- en seksualiteitskenner, antwoord: Leonie, as jy al my raad aan ander gelees het, sal jy weet dat ek glo in ’n huwelik waar beide die man en vrou 100% alles van mekaar weet en okay is daarmee. Dit is tog die enigste manier om iemand waarlik lief te hê, wanneer jy waarlik die persoon heeltemal ken. So die ideaal waarna jy sal moet strewe, is om vir jou man te vertel. Die rede hoekom ek nie in geheime glo nie, is omdat ek voel dit is soos kanker wat jou van binne opeet. Maar ek moet hier ook noem dat jy jou tydsberekening moet regkry, want die nuus gaan jou man heel waarskynlik  onkant vang. As julle alreeds sterk kommunikasiekanale tussen julle het, gaan voort en vertel hom. As julle nie regtig diep dinge met mekaar deel nie, is dit dalk nie die beste onderwerp om mee te begin nie. Begin om iets uit jou verlede te deel wat hy nog nie van jou weet nie. Wanneer jy en jou maat “kaal” staan voor mekaar deur  oop en eerlik te kommunikeer, is dit belangrik om nie aanvallend of verdedigend te raak nie. As hy kwaad reageer, moenie jouself verdedig of probeer regverdig nie – bly by: “Ek is jammer ek het jou seergemaak.”

Aangaande jou vraag oor die toekoms van die vriendskap: Ek dink nie jy hoef enigiets drasties te doen nie, maar bewaak jou hart en as jy enigsins gevoelens begin ontwikkel vir hom, is dit tyd om drastiese stappe te oorweeg.

Vraag 2: Meer as vriendskaplik . . .“My vriendin se man lê  by my aan. Die dilemma is dat  ons nog altyd goeie vriende was en lekker grappies met mekaar kon maak. Ek kom agter daar steek deesdae iets meer agter die grappies (wat hy byvoorbeeld net sal maak wanneer sy vrou dit nie hoor nie!). Wat maak ek? Vertel ek haar of konfronteer ek hom, of los ek net alles en hoop dit gaan verby en dat hy aan my lyftaal sal lees dat sy gedrag nie aanvaarbaar is nie?” – Lea, Potchefstroom

Elmari Mulder Craig, seksuoloog en verhoudingskenner, antwoord:

Hierdie is ’n moeilike situasie, maar ongelukkig ook ’n realiteit waarmee mens dikwels gekonfronteer word. Dit is belangrik om so gou as moontlik baie duidelike grense te stel. Moenie dinge net los en hoop dat dit vanself beter gaan word nie. Dit gaan nie, en voor jy jou kom  kry, is jy in ’n moeilike situasie vasgevang. Vertrou jou intuïsie – as jy ongemaklik voel, het jy rede om ongemaklik te voel. Moenie saam grappies maak en “flirt” nie. Sê reguit as iets jou ongemaklik laat voel. Dit is gewoonlik beter om hom te konfronteer en jou grense duidelik te stel. Só kan jy jou vriendskap met jou vriendin en haar man behou. Om bloot jou vriendin in te lig, is gewoonlik gekompliseerd aangesien sy dan in die middel staan en dit eintlik jóú woord teen haar man se woord is. Indien sake egter nie verbeter nie, behoort jy dit te oorweeg om so onemosioneel moontlik jou vriendin in te lig of kontak met haar man so ver as moontlik te vermy.